ملاحظة : تم التعديل بعد إستعمال سنتين ، لا أنصح بهم
للأسف لون البهارات يصبغ فيهم ، ما يتحملوش غسالة المواعين ، تقلل من جودتهم هلبا ، يعيشوا اقل من التيفال ، و هم اصلا تيفال لكن نوع أردأ من التيفال الأصلي ، تيفال الشريف افضل بألف مرة .
اليوم كتبتلكم ريفيو على طناجر الشريف جرانيت يلي الكل عجبوهم الفترة هذه وانا وحدة منكم ، و بما أنهم ب600 و طالع في هلبا مترددينيشروهم بدون ما يعرفوا تفاصيل عليهم ، رغم ان الماركة معروفة وماعليها غبار ، لكن لابد في عيوب او اشياء بسيطة لازم نقولوا عليها يمكنالعيب البسيط هذا عند غيرنا مشكلة
انا خذيتهم من محل في مدينة صبراتة مقابل مول صبراتة 9 قطع ب605 دينار و الكمية نفذت انا كنت الزبون ما قبل الأخير لأن الإقبال كانرهيب و بصراحة الخيارات كانت محدودة مش زي صفحة الموزع المعتمد الالوان و التنوع متوفرات في صفحة الموزع المعتمد ، اما في المحلاللي خذيت منه كان متوفر سيت 9 قطع فقط ولما مشيت كان في لون رمادي و برتقالي فقط و ممكن يجيبوا منهم تاني الله اعلم .
المحتويــات :
طنجرة عميـقة غطاء زجاج رقم 24
طنجرة عميـقة غطاء زجاج رقم 18
طاوة عادية رقم 24
طنجرة بالكسكاس غطاء ستيل رقم 20
طاجيـن كوشة عميـق دائري رقم 24
نجوا للناحية العملية :
السيت كما مصور بالتفصيل تحت كل صورة مكتوب عليها الشرح .
و السيت هذا يختلف عن السيت الثاني (متوفر عند الموزع المعتمد) في الاحجام و عدد القطع ادخلو لصفحة الشريف الموزع المعتمد كاتبمقاس كل طنجرة بالتفصيل ... ح نحطلكم مواصفات السيت يلي شريته :
كلمة 9 قطع يعني حتى الغطاء محسوب قطعة .
العيب يلي كان ، من وجهة نظري هو ان الطنجرة و الكسكاس كانوا صغار ، و لما فكرت نستغل الطنجرة للرز لقيت تصميمها خفيف يعنيمش ثقيلة زي الباقي ، يعني مصممة للمسقي و للطبايخ و الصلصات اكثر من الرز ، تمشي للمكرونة و للرز ممكن بس مش بنفس كفاءةباقي الطناجر يلي غطاهم زجاجي لأن سمكهم اكثر .
هذا هو العيب يلي لاحظته ، اما عن الخدش فما يتحملش الخدش يعامل معاملة التيفال ( وهنا كانت الصدمة) و اي خدش يؤدي لكشفطبقة الألومنيوم و تفاعلها مع الطعام .
ملاحظة : اغلب الماركات الجرانيت قابلة للخدش مش عيب بس في طقم الشريف .
عيب آخر مادي ، انهم ما يبيعوا فيهم بالقطعة كان هذا تقدري تبدلي الطنجرة و الكسكاس اما بقطعة تانية اما بطنجرة و كسكاس بحجماكبر .
مميزات :
تسوية الرز في طنجرة مقاس 18 و مقاس 24 رااااائع ما يلصقش و حبة بحبة الله يبارك ...
طاوة القلي راااائعة ...
طاجن الفرن رائع جدا ...
الطقم هذا طاوة القلي بتاعه بدون غطاء زجاجي ، لكن غطاء طنجرة مقاس 24 يصلح لطاوةالقلي و حتى طاجن الفرن لانهم نفس المقاس ، لوحابة تطبخي في طاجن الفرن على الغاز ممكن تغطيه بالغطاء نفسه لكن ما ادخلي الغطاء للفرن أكيد لأن فيه بلاستيك .
و في الأيام الجاية كل مرة ح نتكلم عليهم كل ما نطيب فيهم حاجة ❤️
تعليمات الاستعمال المكتوبة على الصندوق مهمة : طالبين انك تدهني كل الاواني بالزيت و تسخنيها و بعدين تغسليها قبل اول استعمال .
... ما ننصحش بطنجرة و كسكاس جرانيت ولا تيفال يلي يبيعوا فيهم منفصلات نحسهم زايدات الحق لان كسكاس الشريف ستيلستينمازال احسن فلاش تشروا في الجرانيت و التيفال للمبوخ ...
الفرق بينه وبين السيت التاني
الطقم الثاني ، حجم الطناجر اكبر
حجم الطنجرة و الكسكاس اكبر
الطاوة بتاع القلي اكبر و معاها غطاء و عميقة زي طاجن الفرن
اخر شي في ماركات تانية حلوة و أرخص و تنباع بالقطعة جرانيت و الوان احلى للي مش حاب يشري سيت كامل الشريف في خياراتاخرى مش لازم الشريف .
