يومها كان الجو جميل جدا , و كانت السيارة فيها عطل يعني يا دوب تاخدنا مشوار بسيط
الصبح ما فطرنا و طول فقنا نجهزوا في أنفسنا ...
المهم قلنا هيا نمشوا ع السريع و ناخدوا معانا غدانا و فطورنا , شنو نديروا غدانا يا ربي شنو نديروا غدانا 🤔
غدانا هو عشا امبارح اللي بالتلاجة , سمك مشوي و سلطات و خبز و الفطور درت شاي و رفعته في مق حراري كبير بدل الترمس
و طبخت بيض ومعاه زيتون و خيار و طماطم و صلى الله و بارك
وصلنا للمكان القريب اللي متفقين عليه و فتناه كل مرة نقولوا خلي نبعدوا اكتر ليييييييييييين لا أعلم كيف صرنا في الجبل اللي طريقه كلها فاتت و انا ندعي و مغمضة عيوني لأن السيارة فعلا كانت مش كويسة ...
وصلنا و بصراحة المنظر و الجو نساني التوتر اللي كان طول الطريق خصوصا الصداع لاني بلا فطور ومع الضغط ...
فتنا ع هلبا مناطق بالليبي ما خلينا منطقة تعتب علينا خلطناها زنتان على رياينة على مش عارفة الباقي اسماءهم 🙄
المهم درسنا شوية في منتزه كشافة ولا شنو اسمه في الزنتان و لقينا فيه رحلة للكشافة صورنا شوي ولفينا فيه و طلعنا
فطر غريب صراحة
هذا العش لقيناه مرمي
علقناه قلنا نديروا بيه تظليل اعلامي
الملفت ان كل شجرة طايحة او ميتة باديين يزرعوا في مكانها في شجرة جديدة
ومنها شدينا الطريق تاني
درسنا هنا في المكان هدا و خلاااص ميتين جوع قلنا ناكلوا قبل لا نكملوا مقدمها تغليفة المخدة صح 😁😁
هنا ممكن احنا كنا في مقبرة و احنا مش عارفين الله اعلم 😬
و منها مشينا لسد وادي التوت ... من سنيييييييييييييين ما شفته من ايام الرحلات بال20 سيارة 😢 صور سد وادي التوت
هدي المية ما فهمت من وين جاية ولا شنو وظيفتها بهالكيفية
قعدة رااايقة لعند ما شفنا ناس جايبين اكياس فاضية و في ايديهم حاجات دائرية كبيرة نوعا ما , هنا الخنس اشتغل و الحس الأمني قاللنا انهم ملقطين ترفاس نضنا طووول للمكان ال شفناهم جايين منه و لقينا الطريق فيه حفر هلبا , لااا خلاص هدا ترفاس رسمي و لقطوه و كملوه علينا 😅
لفينا لفينا ما لقينا غير الصبر , وفي الاخييييير تذكرت ان معاهم عجايز , يعني دام الاكياس فاضية و في حفر يعني كانوا يدورا في ترفاس و ما لقوش و ال شادينه كان عبارة عن حجارة للتيمم للعجيزات 🙄
جمال السد في إنه مرصوص كله بهالكيفية , لولا المخربين اللي محاولين فك الشبكة و مقطعينها في بعض الأماكن للأسف
المية في الفيديو ساحرة كيف تتلألأ
روحت و كنت منتهية , و بصراحة أكتر رحلة علقت بذاكرتي هي لأن فيها مغامرة و خالية من الترتيب و التكلف و لا انشغلنا في شوي و لا طبخ يعني الوقت فات استجمام خااالص .
