بعد ما تمرري القطنة ع وجهك تخلي الحليب ينشف ع وجهك 10 دقايق و تغسليه و تنشفي .
بديل الهايلايتر , الباودر الحرة و غيرها ... بدائل بالميك أب ... makeup ideas
عناية و نصائح يناير 10, 2019
بلا طول سيرة
ما حصلت فرش تنباع بالوحدة ، يعني انا مضطرة اني نشري سيت فرش كامل لحتى ناخد اللي لازميني منهم و نكب الباقي في ظلام الارفف و الفرش بهدييييك الحسبة -_-
هالفرش كوبي درجة تانية حسب معلومتي وسعرها بسيييييييييييييييط جدا
شريتهم ب 15 دينار ... و بعد فترة حطوا عليهم تخفيض صاروا ب10 دينار
صورتلكم الفرش و كتبتلكم استخداماتهم حسب ما انا نستخدم فيهم
يعني مش حسب الميك اب ارتست ايوااااه لأن السيت فيه نواقص مقارنة بالأصلي
عيبه الوحيد انه ناقص فرشاة دمج الظلال الأساسية
جودة الفرش ممتازة جدا و تساعد هلباااااا في الدمج للمبتدئات
هدي صورة مقربة ليهم
الفرشاة الصغيرة اللي حكيت عليها بالصورة الأولى هي اول وحدة ع اليمين
انا ممكن نستخدم في الخمس فرش هادم فقط وهما سبب شرائي للسيت
تنفع في الشتاء تدفي ^^ و صارت معاي بالشنطة وقت نكون مش قادرة ناكل و مشغولة نمرقلي ملعقة ع السريع :D
3ملاعق زبدة فول سوداني
ملعقتين طحينة
3ملاعق نوتيلا او عسل او حليب محلى او دبس تمر (رُب التمر)
كوب مكسرات مطحون وسط
ملعقة حبة البركة
لو حابين تصحصحوها شوي ذوبو نص ملعقة نسكافيه في شوووووي ماء مغلي وضيفوه للخلطة , المهم الماء يكون اقل قدر ممكن حتى ما يخرب قوام الخلطة ولحتى ما تعفّن و تقاوم اطول مدة .
تؤكل صباحا مقدار ملعقة لأن سعراتها عالية وممكن تزيد الوزن .
ممنوع أكلها بالليل لأنها ممكن تسهّر .
تحفظ في الثلاجة .
هدا شكلها بعد ما نخلطها
السلام عليكم
انا عاااانيت من تساقط الشعر المقرف
و كل ما نجرب منتج طبي اولا يكون غالي ثانيا يكون مراحل 😪 يعني كورس معين و تنتقلي لشي تاني ، المهم شي مقيت للغاية !
أما وصفات و خلطات الشعر اغلبها محبطة لانها معقدة وفيها كذا مكون و احيانا بعض المكونات تكون مقززة او فيها رائحة اع ف تتجاهليها و تشطبيها من راسك
الى ان قريت خلطتين للشعر كل و حدة في فترة زمنية مختلفة
بس لانهم سهلات قلت نجرب الخلطتين مع بعض ولان ريحتهم عادية
استمريت عليهم شهر لعند الان
التساقط فعلا خف هلللبااااا
عيب الخلطه
ان السدر يجفف الشعر
وشامبو الاطفال كذلك
فلازم من شرب الماء هلبا و لازم من نهتم بحمام زيت عادي ، مرة على الاقل لحتى ما تتغير طبيعه الشعر للخشونة
هدي الخلطة البسيطة بالتفصيل
❤️
...
الشمووع و ما أكتر استخدامها في ليبيا هالأيام بسبب الكهرباء -_-
بكل أشكالها و ألوانها و روائحها ممكن نستغلها لتحسين مزاجنا ... اي والله شفتوا السلام الداخلي -_-
و كالعادة نحساب روحي اخترعت شي جديد و لما نبحث بالنت نلاقي منه كومااايات وأكداس و دستات بس ع العموم لكل واحد لمسته الخاصة (بردي ع كبدك بردي)
فكرتي ال كنت نحسابها فكرتي ههههه هو تصميم شموع او ديكورات للشموع بمواد منزلية بسيييييطة جدا ممكن نستغل هالأفكار في المناسبات او قعدات الإستجمام (جو إيكوسان يعني)
أو لما بتستخدمي آلة الشمع
أو لما بتستخدمي آلة الشمع
ع اساس روقان -_-
المهم نخليكم مع شوية أفكار بالمواد المتوفرة عندي
بس قبل كل شي شوفولكم هالشوفة ... شي يريح الأعصاب صح ؟ ... والا انا مبالغة بحبي للشموع -_-
اول شي و اكتر شي موجود عندي هو الصدف و هالصدف عملت منه كذااااا شي و هالصدف طبعا جمعته من زيارة لمدينة صبراتة بمكان ساحر اللي هو هدا
المهم نحط الصدف بكوب زجاجي ونسكب فوقه ماء (وممكن نحط الملونات الغذائية لو عندي بس ما عندي كه ) ونحط الشمع ... عارفة الخطوات صعبة معلش ركزوا -_-
الصورة والنور مطفي
او ممكن نستعمل الكؤوس ونقلبها والأفضل تكون الكؤوس مش منقوشه شكلها يكون أحلى
ممكن نشيل القطعة المعدنية للشمع يكون احلى
ممكن نستخدم الورد الطبيعي او البلاستكي ونثبته بغراء لأنه ح يطفو بالماء (قوية الجملة)
بالله شوفولي هالشراح والبراح النفسي (قاااعدة تبالغ)
ممكن نستعمل الورد المجفف الصراحة انا ما نحب الورد المجفف وكان عندي منه ألوان جميلة أخضر وموف و أصفر بس يجيبلي في إكتئاب هو وغباره اللي صعب يتنظف بس وانا نحط في الورد بالكاس صار يعطي في لون الصبغة بالماء ووقتها ندمت اني رميت الألوان الأخرى :D
كل مرة اللون تبع الورد كان يغمق أكتر وريحة عطره تفووووح أكتر و أكتر (اي والمعنى؟)
خلاص لما ماعاد لقيت ما نخترع هههههه درتهم ع دورين و قعدت نتفرج ع برنامج ستايل اللي ماليشي علاقة بالستايل طبعا , بس اهو عاد قعدت ساعة وانا نتفنن و بعدين نرجع كل شي مكانه طول لا عاد -_-
حبيت نقلكم ان الكوب اللي بالدور الفوقي كوب لإبريق انكسر و تو نقلكم بشنو استغليت الإبريق المكسور بتدوينة تانية ^^
...بسم الله
بالمختصر هالآلة أفضل من آلة براون لأني جربت الإتنين
و أكيد الاتنين أفضل من السويت
الآلة عبارة عن 3 قطع
زي ما موضح بالصورة
و آلة التسخين تستمر معك و الورق و مخزن الشمع كل ما يخلصوا جيبي غيرهم !
الطريقة تشيلي الأغطية الخاصة بكل قطعة و تركبي القطعتين ببعض زي ما بالصورة
تخلي الآلة بالكهرباء ساعة اذا الجو بارد و الشمع جامد جدا او اذا صيف تخليها نصف ساعة بالكهرباء و الاستعمال يكون برضو و انت حاطة الآلة بالكهرباء
الميزات
أقل ألم عن الحلاوة
تنفع للوجه
تنفع لإزالة الجلد الميت مش بس لإزالة الشعر
تنبيهات
حاولي ما تحطي الشمع اكتر من مرة على نفس المنطقة لأنه يسبب تهيج للبشرة
الشي المزعج فيها
بقايا الشمع بعد ما تخلصي
ممكن تشيليها بزيت الأطفال زي جونسون او اي زيت نباتي تبع الطبخ او فازلين , مع العلم في زيت خاص بإزالة الشمع ينباع في عبوة بخاخ شفافة ومكتوب عليها كل شي بالانجلش , يعني لو صاحب المحل مش عارفها دوروها بنفسكم في قسم الزيوت و الشامبوهات .
الماء البارد او الساخن ابدا ما يشيل البقايا بالعكس يزيد يدبقها بالجلد
الإستخدام الصحيح و لحتى تحبيها!
تحطي الشمع في إتجاه نمو الشعر
وتحطي الورق فوق الشمع فورا وتشيلي عكس اتجاه نمو الشعر
أهم خطوة
بعد ما تخلصي استخدامها لااازم تمسحي بوحدة من ورق الشمع كل الشمع اللي على الرول يعني اللي الجزء اللي يلامس الجلد لحتى وقت ترجعي تستعمليها ما تعاني من انسداد للرول و تضطري تقلبي الالة وهي ساخنة لحتى تسخن الشمع اللي ساد الرول و يصير الرول يتحرك .
أفضل نوع شمع هو العسل و ليس الليمون او ماء الورد , جربتهم وكان العسل هو الافضل .
و أخيرا
البسي قفازات او تجنبي تلمسي الشمع لان ح يربكك جدا -_-
هالآلة شبيهة جدا بشرائح فيت الشمعية إلا أن شرائح فيت مزعجة من ناحية انك صعب تسخنيها مضبوط بإيديك ولازم تستعيني بالإستشوار في تسخينها لحتى تشيل صح و ما تحتاجي تكرري و تستهلكي شرائح أكتر
بالآخر شكرا لمن نصحني بهالآلة لأنها جميلة فعلا خصوصا للوجه .
