ريفيو منتجات فلورمار | برايمر فلورمار ILLUMINATING PRIMER MAKEUP BASE | فاونديشن فلورمار Flormar HD İnvisible Cover Foundation | مثبت مكياج فلورمار Flormar Make Up Fix Spray
يوليو 07, 2019
سبق و حطيت ريفيو عن أقلام فلورمار و الظاهر
ان أجمل شي في هالماركة هو الأقلام
نكتب عن تجربتي بالمختصر المفيد للمنتجات اللي
شريتها من فترة
البرايمر و الفاونديشن و مثبت المكياج
البرايمر
ILLUMINATING PRIMER MAKEUP BASE
البرايمر طبعا هذا الوحيد في هالماركة اللي
كان متوفر بالمحل رغم اني قبل ما نشريه كنت متأكدة ان في واحد تاني خاص بتقليص
مظهر المسام وقريت عليه انه كويس جدا , لكن قلت يلا نجرب هدا و خلاص دام ان هذا الموجود وقتها (و ما ضيع فلوسي الا هالكلمة الحقيقة)
و كررت نفس الخطأ و هو اني لما ما نلقى اللي
نبيه مفروض نتراجع مش نشري اي شي وخلاص
طيب انا قلت بالمختصر
البرايمر مميزاته ترطيب وتقليل الدهون و صقل الفاونديشن كويس (حلوة صقل ها ) و لازم تحطي منه نقطة بسيطة جدا لان لو كثرتي ولو شوي بشرتك ح تبدا
عبارة عن اسفنجة زيت وهالشي صار معي , البشرة صعب تتشربه و لازم تنظيف عميق و
بالوييييل لحتى تخلصت منه من على وجهي
لما حطيت منه شوي ع منطقة الخدود والانف و الجبهة
و الذقن نقدر نقول انه قلل افراز الدهون رغم ان كثرته تخلي الوجه دهني الا ان نقطة
منه ع هالاماكن دارت تأثير واضح لكنه مش مثالي مية بالمية يعني لو وجهك دهني هلبا
مش ح يفيدك ولو وجهك جاف ح يعجبك البرايمر خصوصا لو عندك قشور في وجهك و جفاف لان ترطيبه قوي جدا ,,, القصة اني شارياته كالعادة لاخفاء المسام لكنه لا يملك اي تأثير على المسام نهائيا (هالمسام ال صدعتينا بيهم شكله وجهك غربال 🙄 ) .
مستحيل نعاود نشريه لان مميزاته مش مستاهلة
نجو للفاونديشن
Flormar HD İnvisible Cover Foundation
اولا مش تغطية كاملة يعني لا ينفع للسهرات
ابدا ولا تغطية متوسطة ولا حتى تغطية خفيفة ! هو فعلا زي ما كاتبين :
İnvisible
يعني تحطيه كانك ماحطيتي اي شي ع وجهك مجرد نظارة وخلاص
قوامه زي الطين الخفيف يعني لاهو مائي ولا
زيتي يعني ينفع لجميع انواع البشرة ع اساس بس انا حسيته يدهن لان بشرتي مختلطة ما
ريحني حتى لو مظهره مش دهني احساس انه دهني موجود ! حزيرة دي ولا ايه 🙄 ؟!
الميزة اللي عجبتني ان فيه درجات هلبا و درجة
الاصفر موجودة يعني في درجات متنوعة و الاندرتون بتاعها متنوع في اللي ع الوردي و
في اللي ع الاصفر لذلك صرت نخلط فيه مع فاونديشن تاني كمصحح لون و ليس كأساس
لانه ككريم اساس ما يمشي الا مع وحدة تبي
ترتاح نفسيا انها حطت مكياج انما هو مجرد كريم عديم اللون ممكن يعطي نظارة فقط ,
بالمختصر ينفع جدا كريم يومي .
فيه حماية من الشمس30
مش ح نشريه تاني يعني بدون فائدة حسيته انا
كنت نبيه للمناسبات
اخر شي الفكس سبراي
Flormar Make Up Fix Spray
مثبت المكياج الشي الوحيد اللي نقدر نقول عليه على طول انه الجميل فيهم
ممتاز الى حد كبير , عيبه انه معبي كحول لازم
ترشي من مسافة بعييييدة ع وجهك و تسكري عيونك بايدك لأن الافضل تتجنبي ترشي عليهم حتى و
هم مسكرات لاني جربت رشيت و عيوني مسكرة بدون ما نغطي بايدي عليهم و ساح الايلاينر وبقت هيصة اللهم بارك
انما يثبت الفاونديشن و الباودر و يدمجهم
يعني مافيش منظر تكتيل او غبرة نهائي
1 التعليقات
معناها نتوكل وناخدة الفكس سبراي ؟
ردحذفأكتب تعليقاً على هذا الموضوع و سيتم نشره فور مشاهدته