البرودو الليبي

و هي شوربة خضار صحية و مغذية يمتاز بها المطبخ الليبي التقليدي , يمكن تحضيرها مع مكعبات الدجاج او اللحم او بدونهما لكنها ألذ بالدجاج , يضيف البعض لها بعض الحبوب كشوربة لسان العصفور أو الشعيرية أو الفريك أو البقوليات كالعدس او الفول او البازلاء .

اغلب الأحيان البرودو الليبي هو حساء شتوي نظرا لتنوع الخضار في الشتاء و لذلك ألق عليه إسم برودو أو برودة , لأنه الحساء الذي يقدم في البرد او للمصابين بالبرد  نظرا لكمية المكونات المغذية به .

المكونات :

الطريقة :

نشوح بصلة مقطعة مكعبات مع مكعبات صدر دجاج او اي جزء من الدجاج حتى لو بالعظم .

اول ما يذبل البصل دون تحمير نضيف مكعبات الطماطم و الجزر و البطاطا و الكوسا و الكرنب الزهرة و الباذنجان شرط يكون نوعالباذنجان ممتاز و ليس مر ، و نضيف اي خضار متوفر (انا نحب اللفت يعطي نكهة شبيهة للكمأ"الترفاس") و نقلبهم في الزيت شوي ،نضيف روس بصل صغير دون تقطيع 

نضيف كمية وفيرة من الماء 

ملح و بهارات خفيفة لحتى ما تفقد المكونات نكهتها و احيانا لتغيير النكهات نضيف بهارات زيادة زي اللومي و بهارات خاصة بالشوربات .

نغطي الطنجرة لعند تنضج المكونات ، اذا احتجنا زيادة ماء نزيد

اول ما توصل الشوربة للقوام المطلوب نضيف راسين ثوم مقطعات شرائح او راس ثوم واحد مهروس مع قطع فلفل اخضر حار او خلو حسب الرغبة ياخذوا غلوة و نطفي و نضيف زيت زيتون على الوجه و نقدمها مع الليمون .

ممكن نضيف لسان عصفور او فريك للشوربة أو شعيرية مش متحمصة  , قبل الثوم ونعدل الماء و نخليه يستوي بس انا نحبها خضار و دجاج فقط دون اضافات أخرى.

أو ممكن نضيف عدس او اي بقوليات أخرى,  لكن  لازم ينحط من الأول مع الخضار لحتى يستوي و هالمرة أنا ضفت للبرودو العدس الأحمر او العدس بدون قشرة و كان لذيذ .

ممكن نتخلى عن اللحوم و نستعمل مرقة مفرزة عندك من اكلة سابقة ، او مكعب مرق يكون حلال وبدون جوزة الطيب .

ممكن نطحن الشوربة و تبدا قوامها واحد (برودو مطحون) .