زمان ايام الرحلة المدرسية كان مطلوب مني نجيبلهم الدجاجة المحمرة يلي ادير فيها امي و ما نجيبش اي شي معاها الا لو انا نبي نجيب ، و باقي صاحباتي يجيبوا كل شي هذا كله في سبة الدجاجة المحمرة اللي ادير فيها امي وهي لا محمرة لا سو تسلقها في مياه و ملح و نكهات و تقليها في الزيت مع عود اكليل في الزيت و تغطيها وكل مرة تقلبها ع جنب و تجي طعمها ماليشي حل و لتو ما يقدر حد يديرها زيها رغم بساطتها ! تنوض الفجر ع خاطرها و تلفلي انا وحدة و خوي وحدة نبدوا ماشيين للرحلة تقول رافعين وجبة كبسة ما زينا حد 😅و الله الدجاجة دايرتلنا هيبه كانت و الكل كان يترقب فيها 😂 و مش لان ماديا ما عندهم بالعكس كانوا يجيبوا في كل شي لكن هالدجاجة فيها الزايد ❤️

طبعا ضروري يكون جلد الدجاجة موجود غير المرة هذه الجلد منحيه الجزار !

ومنها انا خذيت الطريقة ديما بعد ما نسلق الدجاج نحمره و نحطه جنب الأكل .