زراعة الجرجير في المنزل | الفرق بين زراعة التربة و زراعة الأصيص

نوفمبر 03, 2019

طلللع عيني على بين ما طلع كل يوم وانا انوض نتصبح فيه لو طلع او لا و قريب يئست و قلت ممكن فشلت في زراعته و انا ناااوياته يعني لازم يكون عندي جرجيرمنزلي للسلطة يعني لازم !

و الصورة مقربة جدا يعني بصعوبة شفته بعيني انه نجح و طلع 😁

ندخلوا في المهم :

يمكن زراعة الجرجير طوال العام و لكن الميعاد الأنسب لزراعته يكون فى منتصف شهر أغسطس حتى آخر شهر نوفمبر.

أنا زرعته في نهاية شهر 10

جبت البذور و غرستهم في تربة مخلوطة بسماد عضوي و عملت فيها فتحات سطحية بإصبعي بعمق عقلة إصبع = 1 سم , و غطيت البذور بالتربة و سقيتها برشاش لمدة 3 ايام بعدين بديت سقي عادي

طبعا بعد ما سألت كان في طريقة تانية و هي ننثر البذور على تربة مبللة بدون ما نعمل حفر و نغطي البذور المنثورة بطبقة طفيفة من التربة و نسقي بالرشاش

النثر يكون على تربة مشبعة بالمياه و التربة اللي نغطي بيها تكون جافة لحتى نميز البذور الي تغطت و اللي لا بسبب إختلاف لون التربة المبللة و الجافة ... هكي الجرجير يطلع أسرع لكن الجذور مش قوية زي الجرجير المزروع في عمق .

استنيت اسبوع بطريقتي تبع الحفر بعمق عقلة إصبع , على بين ما طلعوا و فرحوني !!!

الري كان كل يوم , لما يطلع الجرجير فوق مستوى التربة ح نوقف ري ليوم او اثنين لحى تقوى الجذور و بعدها نعاود ري كل يوم كالعادة ... و لو حسيت التربة جفت عادي نسقي مرتين صباح و مساء , لكن بعد ما يكبر الجرجير لازم كل 3 ايام نعطش الجرجير يوم واحد فقط و نرجع للسقي عادي كالمعتاد و نكرر العملية كل 3 او 4 ايام لاحظت الجرجير يطلع اقوى بهالطريقة .

هدا الكلام كله ينطبق على زراعة الجرجير في الأرض او الاصيص , الفرق بينهم الاتنين و الأفضل موضح بالصورة تحت