حاليا الكهربا مقطوعة و تبيلها ساعتين تانيات لحتى تجي ، بروحي في البيت ، و المطر من الصبح لتو تنزل ... سرحت بتفكيري و قلت نشخبطلي شوي ...

أنا من الناس الكثيرين ال يعانوا من عدم تأقلمهم مع معظم الناس ... فكرت ليش انا مش قادرة نتقبل الحديث مع فلانة و فلانة و يضايقني وجودي معاهم !

ليش ما نحب الكلام ع اللبس و الأكل و الفلوس و الفسحات !
ليش يضايقني كلامهم ع الدنيا و كأنها حياة الخلود  و ال ماعاشها تو برخاء يعني هو تعيس ومسكين !!!

بصراحة كل الاشخاص ال ما نحب كلامهم كان بينهم عامل مشترك و هو انهم ما يشتغلوا او ما يدرسوا و البعض منهم يشتغل او يدرس ولكن مجالات بسيطة جدا مش متعبة ولا فيها تشغيل مخ مجرد شي شكلي وبس !

ممكن انا غلط بس انا نشوف انه السبب الرئيسي هو لما المرأة تكون فاضية فكريا ومش لازم تكون فاضية من ناحية الوقت ، لما تكون فاضية فكريا تكون جاهزة لاي شي تافه غصبا عنها ...
ح تشوف لحياة غيرها ح تشوف للبس فلانة و بيتها و فلوسها ،  ح تغار و تحسد و تشك بزوجها او خطيبها ، ح تحس انها دائما أقل من غيرها و لو حد مدحها في داخلها متأكدة ان هدي مجاملة لأنها حاسة انها ولاشي
رغم انها داىما تمجد في نفسها و كانها افضل خلق الله و هالشي نابع من نقصها لان اي شخص طبيعي حاسس بقيمته بين الناس عنده مستوى ادراك كبير يأهله انه ما يبوح بحجمه امام من هم أقل منه


طبيعي جدا ان الوحدة لما ما تشتغل تحس بكل هالاشياء و مش ضروري اي وحدة تحس هكي بس لما يجتمع ضعف النفس و عدم الشغل يكون الناتج انسانة هشة و مش حاسة بقيمتها و وجودها .

مافي شي يشغل وقتها غير روتين اي بنت او زوجة يعني ال تقدر اي وحدة اديره هي ادير فيه مافي شي جديد او خارق للعادة ! لحتى يرضي نفسها ، مع احترامي لدور المرأة في الأسرة طبعا .

الشغل ح يحسسك بقيمتك لانه الشي الوحيد ال بيخليك تحسي انك تنجزي في شي كبير و ح تلاقي مقابله مردود مادي و نفسي ، تكبري في عين نفسك كإنسانة منتجة ... ليك مكان فعال في هالعالم  عندك مهارة في شي خلاتك تحصلي وظيفة و تكوني ند للي معاك في وسط العمل ... انسانة تشتغل شغل فعال و فيه تفكير و انتاج هل بتفضى تحسد فلانة ع زوجها ؟! هل مازال بيهمها فلانة أحلى منها او لا ! هل مازال بتلاقي وقت لحد اساسا !!!

ممكن مشكلة اغلب النساء انها تكره تتعب و تحب تتزوج و تقعد بالبيت وخلاص ، تمام حلو هالشي للبعض بس لما يكون مخك واعي لدرجة انك مش شاعلة وقت فراغك بالناس ،،، ماهو لو انت امراة مش عاملة و عندك وقت فراغ عبيه بشي لربي مش العكس او يا ستي ارحمي كيانك العظيم ال خلقك بيه ربي كشي سامي و ما تقلليش منه و حاولي ... تشتغلي !!!