مافيش حد يحب المشاكل ، ما فيش حد يحب يقلص علاقاته ، لكن الناس طماعة كل ما تحسنلها تزيد تطلب اكتر و تعتبر عدم قدرتك ع شي تقصير منك ، و كل شي درته فيما سبق و فرحان انك باني بيه مكان في قلوبهم يتضحلك انه سرااااب انه غبااار و نفضوه و نسوه و اعتبروه لاشيء ، يوجعك الوقت و التعب و احساس انك مستهلك جهدك في غاية لا تدرك ...

 ربي لما يزرع حبك في قلب حد ، حتى لو ابتسمتله يعتبرك درتله شي كبير هو الحب هكي سحره ! ، بينما لو مافيش حب تجاهك فما فيش الاكتفاء بأي شي من ناحيتك و يبدا الطمع و الاستغلال ليك و لصحتك النفسية اولا ...

الحب بطاقة عبور ... و الحب من ربي مش شي انت ممكن تصنعه و تقدمه او تزرعه في قلب حد تجاهك ... حد يقدر يبرر ليش يكره الجوافه متلا ؟! مع ان في هلبا يحبوها !لكن انا بدون سبب او لاسباب غير مقنعه للبعض نكرهها و نوصفها بأبشع وصف لحتى نوصل للناس كم هي منبوذة و ليش هي منبوذة من قبلي ... ومافيش حد ح يقدر يحببني فيها مهما عصرها و ضافلها سكر و منكهات ، حتى لو ذقتها و عجبتني ، مجرد  ما نعرف انها هي الجوافة نفسها ال انا نكرهها  ح ننفر منها ع طووول ...

نحنا جوافة في حياة هلبا أشخاص !
لكن ليش نحاولوا نكرهوا الناس في الجوافة دام هما يحبوها !
زي ما الحب مش شي يتقدم ... الكره شي صعب ينزرع في قلوب وفية ... فما اتعبوش انفسكم اللي يحب الجوافة مستحيل يكرهها لانه شايف فيها شي احنا مش شايفينه .

بقلمي -_-

محاضرة بالصلاة على النبي -_-