قواعد إلتقاط صور جميلة شبيهة بالإحترافية .. المقال الأول
مايو 26, 2018
السلام عليكم
مرحبا في اول مقال يا رب يفيدكم و كل الصور المستعملة للشرح هي صور من تصويري نالت استحسان الغير فخديتها كنموذج توضيحي
أولا أنا لست بإحترافية و لا مطلعه ولا تلقيت دورات في مجال التصوير
انا هاوية و الصور اللي انزل فيها سواء هنا او على المواقع التانية ليست سوى نظرتي الخاصة للشيء الموجود بالصورة واللي اساسا قد يكون عكس قواعد التصوير الشائعه اللي يلتزموا بيها المحترفين
*1*
خليني نقلكم أولا ان الكاميرا ال عندي ممكن يكونوا موبايلاتكم افضل منها لاني نعتبر فيها ضعيفة جدا لانها تنقل في الصورة كما في الواقع تماما , ونحن طبعا في عالم الزيف و البهرجة !
صورة طبيعيه اما صورة محسنة ح تفوز ع طول الصورة المحسنةلأنها جذابة أكتر
ومش غلط طبعا ولكن الغلط هو انك تصدق أقوال ال يقلك الكاميرا مش شرط اساسي لصورة جميلة
كلام غلط لو كان كلامهم صح أسألهم ليش عندكم أجود الكاميرات الإحترافية ؟ والعدسات المنوعه ؟
إذا احدف هالشعارات البراقة الزائفة و اقتنع تماما ان كل ما كانت الكاميرا احترافية و مواصفاتها عالية كل ما كنت قادر توصل الصورة لمستوى أجمل
نوع الكاميرا ميزانيتك تحدده يعني لازم تقرا مواصفات كل كاميرا و تحدد اقرب شي متوفر مقارنة بفلوسك , ولو انت من المهتمين بالتصوير ع البسيط يعني الصور لا تستخدم في عمل او دعاية او ايا كان يعني صورك لا تتعدى مواقع التوصل الاجتماعي فالأفضل تبدا بكاميرا موبايل و افضل كاميرا موبايل ح تعرفه من متابعتك لصور الناشرين في مواقع التواصل مع كل صورة تعجبك و تسأل عن الجهاز الملتقطة بيه ح تحصر خياراتك , و أنا بعد ما و أخييييرا جبت الاي فون لقيت ان الكاميرا بتاعه افضل من كاميرا ال dslr ال عندي الا و هي كانون 1100 , هالكاميرا رغم ضعف امكانياتها الا اني تعلمت اساسيات التصوير بيها و انا الان مستعدة للتعامل مع اي كاميرا اقوى منها !!!يعني دارت فايدة هههههه
*2*
تاني نقطة لازم تعرفها هي ان صورة بدون تعديل ينقصها الكثير , و صورة مباااالغ التعديل عليها هي ايضا صورة غير مريحة للنظر او على الأقل تعطي انطباع للناظر بأنها رسم او شي مصطنع بعيد عن بساطة الشيء ال بالصورة ويعطي انطباع انك ملتقط صورة ضعيفة فعدلتها هلبا لين بدت بهالصورة.
التعديل يكون طفيف و حسب الحاجة و أهم تعديل ممكن تحتاجه هو تعديل إضاءة و سطوع الصورة
وهالشي ممكن ببرامج الموبايلات و اللاب توب و أفضل برنامج بالنسبة ليا هو برنامج
Adobe Photoshop Lightroom
ممكن تغير الألوان بدرجة بسيطة من خلال هالبرنامج برضو وحسب طبيعه الصورة , هل تقبل تعديل الوان؟ او هالشي بيزيده سوء بدل من يحسنها؟ , يعني لازم يكون عندك نظرة فنية وهنا يختلف مصور عن مصور
مثال ع الصورة المعدلة بالايت روم
هدي قبل التعديل
وهدي بعد التعديل ،،، زدت الاضاءة
*3*
الفلاتر:
شي يعتبر أساسي لو كانت الصورة تتحمل ادخال فلتر , كيف يعني؟
يعني متلا لو كانت صورة دعائية او صورة أكل ممكن تقبل أنماط فلاتر تتماشى معاها,
الفلاتر اما من انستقرام اما من ريتريكا ام من كاميرا الاي فون نفسه نختار الفلتر قبل الالتقاط اما البرنامج البسيط و الجميل اللي متوفر للاب تو والموب وهو
فلاتره مقبوله وجميلة
أما بخصوص برامج التعديل الاخرى ح انزل بإذن الله موضوع مطول بالخصوص خصوصا لكاميرات الموبايل.
...................................................................................
خلاص عرفنا ان الكاميرا الكويسة ح تسهل عليا نجيب لقطات حلوة و ان برامج التعديل ترفع من جمالية و قبول الصورة للناظر
*4*
نجي تو لوقت الإلتقاط , كيف و امتى و الخ !
خلينا نتكلمو بصفة عامة سواء كاميرا او موبايل
قبل كل شي ارفع إضاءة موبايلك او الكاميرا لحتى تشوف كل شي ممكن يطلع بالصورة وانت ما تبيه يطلع , ممكن تاخد صورة و إضاءة الكاميرا منخفضة و فيها هلبا اخطاء انت ما انتبهتلهم وايضا رفع اضاءة الكام او الموب يخليك تحدد سطوع صورتك صح.
نبدوا اول شي طبيعه الصورة ايا كانت فإن أنسب وقت للتصوير هو بين العصر و المغرب و خارج المنزل من خلال التجربة و نصائح العديد فعلا هدا انسب توقيت ,أشعة شمس معتدلة و ظل خفيف غير حاد مزعج للنظر , يعني ايا كانت الصورة اكل , اكسسوار , طبيعه , أنسب شي هالوقت و نطلع بمادة التصوير برا البيت أفضل ولو مش ممكن نختار بلكونة او مكان معين بالبيت تكون إضاءة النهار غالبة عليه و تدخله بشكل كبير .
المانع الوحيد للتصوير برا هو الطقس اما غبار او رياح او مطر
عدا ذلك نصور , ليش ؟
لأن الصورة تطلع بوضوح جميل جدا قد لا يحتاج للتعديل أصلا
وهالنقطة مهمة لو صورت في إضاءة منخفظه ح تطلع الصورة محببه يعني بمصطلح التصوير فيها NOISE
يعني معبية نقط صغيرة ومش صافية , و النويز يزيد كل ما الايزو ISO يزيد يعني كل ما كانت الدنيا معتمه كل ما احتجنا نرفع اعدادت الايزو لرقم اكبر كل ما ساهمنا في صورة معبية نويز .
طيب في من اوقات نصور برا و برضو تطلع الصورة فيها نويز بسيط ؟او اضطريت نصور داخل وطلعت الصورة فيها نويز ؟ كيف الحل؟؟؟
الحل بسيط جدا :
أولا لو التعديل بلاب توب في فلاتر تتحمل و تتركب للفوتوشوب اسمها فلاتر توباز
الرابط حطيته بالاسفل
طبعا لازم تبحثوا ع ارقام السيريال ال تفعل الفلاتر هدي و موجودات ع قوقل سهل تلقوهم
الفلاتر الافضل تتحمل كلها لانها جميلة جدا بس الفلتر ال يهمني حاليا هو فلتر Denoise
استعماله سهل وبسيط و ينحي النويز تماما
أما التعديل بالموبايلات ف فلتر برضو اسمه Denoise ينحي النويز برضو بس مش بنفس جودة فلاتر توباز بس يعطيك نتيجة مرضية و حلوة
اللي يحمل برنامج اللايت روم او السنابسيد فيهم تأثير ازالة النويز ومش بحاجة لتحميل أي برنامج تاني
متلا الجزء اللي ع اليمين فيه نويز و ال ع اليسار متعدل بفلتر دي نويز توباز
يجب تكبير الصورة لملاحظة الفرق
الفلاتر التانية مش شي أساسي لأن في ناس ماشية بقاعدة لازم نغير ألوان الصورة لازم من صورة منافيه للواقع بأي شكل لحتى تلفت النظر , لذلك اوقات يكون الفلتر ال تختاروه مش متماشي مع الموضوع ف يفسده , غالبا الطبيعه مش محتاجة تستخدمولها فلاتر و حتى لو بتستخدموا فلتر بلاش الفلاتر اللي تبهت الألوان و الفلاتر ال تقلب لون البحر رمادي والسماء بيضا يعني الصورة تطلع مشوهة , الفكرة مش في تغيير الصورة لأي شي , الفكرة في التوقيت و الزوايا و التعديل الصح .
تمام هكي عرفنا انسب وقت للتصوير , طيب الصبح بكري الاضاءة جميلة ممكن نستغلها ؟
اكيد ولكن مش اي موضوع يقبل الاضاءة الساطعه و برضو هنا كل مصور وحسه الفني يعرف تكوين الصورة متى يستحق اضاءة ساطعه زي اضاءة الصباح ومتى لا
مبدئيا صور الإفطار تتحمل الإضاءه الساطعه , الصور ذات الخلفيات البيضاء عادي جدا الاضاءة الساطعه فيها بالعكس ممكن تطمس تجاعيد القماش المستعمل في الخلفية وتعطي مظهر املس و موحد
*زي هالصورة متلا
اوقات صعب ننقل المادة ال بنصورها برا لإضاءة كويسة ممكن نستعين بمصادر إضاءه زي لمبة شحن و عاكس ضوئي ممكن نستعمل و رق القصدير بتاع المطبخ كعاكس يقوي الإضاءه , وممكن ادوات إضاءة مختلفه
*متلا هنا استخدمت اللمبة المتنقلة ما نعرفش اسمها شنو !
الصورة كانت بهالشكل
تمام هدي مسألة الإضاءه بأبسط أفكار و إمكانيات
*5*
نجي لوضعية الكاميرا وهدي أهم شي
اولا وقبل كل شي خلينا نتفقو ان وضعية (البقلاوة) غلط ! كيف بقلاوة؟ , يعني إنك تميل الكاميرا او الموب بحيث يكون خط الأفق قاسم الصورة الى مثلثين ! هدي خطأ خصوصا في صور الطبيعه و المباني , لازم خط الأفق يكون أفقي متماشي مع الصورة بأفقية زي المسطرة
مثال
صورة غلط
صورة صح
شوف خط الأفق مسطر تسطير مع افقية الصورة و الصورة مريحة للنظر و تعطيك انطباع ان المصور بارع مش مجرد صورة وخلاص
*6*
الزاوية :
وهنا يبان إبداع المصور , الزاوية الصح و كلمة الزاوية الصح في نظري لا تخضع لقواعد صارمة يعني كل حسب نظرته
مثال
لو نبي نصور فنجان قهوة , نحاول نجي من زاوية غير تقليدية يعني مش بالجنب ولا من فوق هلبا , كيف ؟؟؟
شوف الصورة
الصورة مسلطة على الفنجان ومافيه يعني واضح اني نبي نبين ان المهم بالموضوع هو القهوة وباقي الأشياء مكملات
ميول الأشياء أفضل من اني نميل الكاميرا
الإضاءة كانت بعد العصر
حدة الظل ناعمة ومش ملفتة جدا
استخدمت وقت الإلتقاط : فلتر ايفون دراماتيكي
*7*
ربط فكرة بالصورة:
يزيد يعطي معنى للصورة , مثلا ربطت فنجان القهوة المستدير بإستدارة ميزان الوزن !
رغم ان الصورة كانت تكون افضل لو كانت حدود المجلة افقية مع حدود الصورة , للأمانه بخلت نعدلها ونزلتها كيف ماهي!
العناصر المستخدمة دائما لازم تكون متناسقة مش مجرد تكديس للمواد وخلاص , يعني لازم يكون في رابط بين كل مادة ومادة زي هالصورة :
زيت , توست , سلطة مشوية ... ترابط و توزيع حسب الأكثر أهمية في المشهد
*8*
التقريب و الإقتصاص:
بعض اللقطات جمالها في القرب منها متلا هدي
الاقتصاص : يعطيني انطباع ان الصورة قريبة هلبا متلا هالصورة صورتها بعيدة بعدين قصيت منها النحلة , لو كنت قربت من الأول للنحلة لكانت طارت بس نصورها في اقرب نقطة نقدر عليها بعدين نقصها وتبين انها متصورة عن قرب
*9*
اصنع الحدث :
مش لازم تشرب قهوة لحتى تصور القهوة عادي دير القهوة و صورها !
مش لازم يكون ليل لحتى نولع شموع , طفي النور و ولع الشموع ... و هكذا
التصوير متعة ما تحصرش نفسك في خانة استعراض رفاهية بيتك و أكلك ويكون هدا غرضك من التصوير , لما تحس بشغف تبي تصور ما تستنى شي , وما ادير لشي حساب , البساطة و الجمال وجهان لعملة واحدة .
يتبع في مقال آخر بإذن الله ...
للعلم لما عاودت قريت المقال حسيت روحي د سيف ظريف !
للعلم لما عاودت قريت المقال حسيت روحي د سيف ظريف !
0 التعليقات
أكتب تعليقاً على هذا الموضوع و سيتم نشره فور مشاهدته